गुरुवर्य श्री शशिकांत आण्णा - नव्वदीचा चिरतरुण

 25 मे 2025

श्री. शशिकांत चव्हाण (आण्णा )

आपल्या नव्वदाव्या वाढदिवसानिमित्त, शिंत्रे कुटुंबियांच्या वतीने आपल्याला मनःपूर्वक, अभिनंदनपर व वाढदिवसाच्या लाख लाख शुभेच्छा!

मी पदवीधर झाल्यानंतर जेव्हा मुंबईत पदार्पण केलं, तेव्हा केवळ काही महिन्यांतच मला *पेद्रेवाडी ग्रामस्थ मंडळामध्ये* काम करण्याची संधी लाभली. त्या संधीने मला आपल्या कार्यपद्धतीचे, विचारांचे आणि नेतृत्वगुणांचे साक्षात दर्शन घडवले.
आपली भाषणे ऐकताना एक गोष्ट मनावर खोलवर ठसली – एकीचा खरा अर्थ, कार्यसिद्धीसाठी लागणारी निष्ठा व चिकाटी, समाजसेवेची ओढ आणि शिक्षणाचे जीवनातील अमूल्य स्थान.
त्या दिवसांपासूनच मी आपल्याला मनोमन गुरुरूपाने स्वीकारले. आपल्या विचारांचे अनुकरण करण्याचा प्रामाणिक प्रयत्न केला. मात्र, अजूनही स्पष्ट, सडेतोड बोलण्याची आपली शैली, आरोग्याबाबतची शिस्त आणि वक्तशीर जीवनपद्धती – या काही बाबी माझ्या आचरणात यायला वेळ लागतो आहे, याची कल्पना मला आहे.
आपण लहानपणापासून गरिबीचे चटके सोसत, अपार कष्ट सहन करत जेवढं शक्य होईल तेवढं शिक्षण गावामध्ये घेतलं. त्यानंतर उदरनिर्वाहासाठी मुंबई गाठली आणि तेथे गिरणीत नोकरी स्वीकारली.
मुंबईतील वास्तव्यातच आपण सत्यशोधक चळवळीत सक्रीय सहभागी झाला. ही चळवळ महात्मा जोतिबा फुले यांनी सुरू केलेली सामाजिक आणि राजकीय सुधारणा चळवळ होती. तिचा प्रमुख उद्देश समाजातील अंधश्रद्धा, रूढी परंपरा नष्ट करून गरीब, शोषित आणि वंचित घटकांना न्याय मिळवून देणे हा होता.
सत्यशोधक चळवळीची वैशिष्ट्ये अशी होती :
• अंधश्रद्धा व अन्यायकारक रूढींना विरोध
• शिक्षणाचा प्रसार व लोकप्रबोधन
• सामाजिक न्यायाची स्थापना
• जातिभेद आणि सामाजिक विषमतेचा निषेध
• वैज्ञानिक आणि आधुनिक विचारांची जोपासना
या चळवळीच्या विचारांनी प्रभावित होऊन आपण डिलाईल रोड, मुंबई  परिसरातील कोल्हापूरकर कामगारांना शिक्षित करण्याचे कार्य हाती घेतले. हे कार्य केवळ शिक्षणापुरते मर्यादित नव्हते, तर समाजाला नवचैतन्य देणारे आणि माणुसकीचे खरे मूल्य शिकवणारे ठरले. या अनुषंगाने थोडे काव्यात्मक शब्दरूपी पुष्पगुच्छ सादर करत आहे.

तुमचं आयुष्य म्हणजे प्रेरणेचा जिवंत इतिहास,
संपाच्या संघर्षातून उभा राहिलेला विकासाचा प्रकाश।
मुंबईच्या गिरणी गोंगाटातून गावच्या शांततेकडे वळलात,
पण तिथेही न थांबता विकासाचं स्वप्न उरात जपलात।
सरपंचपदाची जबाबदारी नुसती भूषवली नाही,
तर ती कार्यकर्तृत्वाने अर्थपूर्ण केली।
दहा वर्षांच्या कालखंडात गावाला घडवलंत,
प्रत्येक निर्णयाने समाजाला नवसंजीवनी दिलंत।
विरोधाची वावटळ उभी राहिली तरी,
तुमची नितीमूल्यं कधी डगमगली नाहीत खरी।
धाडसाने घेतलेले निर्णय आजही लोकांमध्ये गाजतात,
तुमचं नाव घेताना लोक अभिमानाने स्तुतीसुमने गातात।
आजही तुम्ही तरुणांना लाजवेल असा जोश दाखवता,
घरगुती असो वा सामाजिक कार्यक्रम, नेहमी पुढाकार घेता।
हा जोश, हा उमेद, हे कार्यकर्तृत्व – हीच तुमची दैवी देणगी,
तुमच्या अस्तित्वानेच आजही गावात सकारात्मक ऊर्जा उसळी।
तुमच्या कार्याचा, समर्पणाचा आणि निस्वार्थी वृत्तीचा जयघोष,
हा आदर्श प्रत्येक पिढीला मिळावा हीच आमची मनोक्ती, हीच अपेक्षा खास।
तुमच्यासारख्या व्यक्तीमुळेच गावाचा चेहरा पालटतो,
आणि समाज एका प्रकाशदिपासारखा उजळून निघतो।

आज आपण जीवनातील विक्रमी टप्पा – नव्वदीचा यशस्वीपणे पार करत आहात. ही केवळ आपलीच नाही, तर आमच्यासारख्या असंख्य शिष्यवत कार्यकर्त्यांसाठीही अभिमानास्पद गोष्ट आहे.
ईश्वरचरणी हीच प्रार्थना की, आपल्या शंभराव्या वाढदिवसाचा महोत्सव आम्हा सर्व पेद्रेवाडीकरांना आपल्यासोबत जल्लोषात साजरा करण्याची संधी लाभो.
आपल्या उत्तम आरोग्यासाठी आणि दीर्घायुष्यासाठी पुन्हा एकवार हार्दिक शुभेच्छा!
आपुलकीने,
बाळासाहेब शिंत्रे