🎶 हेमंतकुमार - अविस्मरणीय मैफल! 🎶

🎶 हेमंतकुमारांच्या अवीट गोडीच्या गीतांची अविस्मरणीय मैफल! 🎶 

दि. 26 सप्टेंबर 2026 रोजी साहित्य मंदिर सभागृह, सेक्टर 6, वाशी येथे संध्याकाळी 6.30 वाजता “स्व. हेमंतकुमार यांची अवीट गोडीची जुनी मस्त गाणी” हा सुंदर संगीत कार्यक्रम श्री. प्रमोद कर्नाड यांनी अत्यंत बहारदार पद्धतीने सादर केला.
हेमंतकुमार म्हणजे भारतीय चित्रपटसंगीतातील एक आगळेवेगळे आणि अजरामर पर्व. त्यांचा धीरगंभीर, मधुर, भावस्पर्शी आणि मनाला शांत करणारा आवाज ही त्यांच्या गायकीची खासियत. त्यांच्या आवाजातील माधुर्य, शब्दोच्चारातील सहजता आणि गीतातील भावनांना न्याय देण्याची विलक्षण शैली यामुळे त्यांची गाणी आजही तितकीच लोकप्रिय आणि श्रवणीय वाटतात. त्यांच्या गीतांना काळाचे बंधन नाही; प्रत्येक पिढीला त्यातून प्रेम, विरह, आनंद आणि आठवणींची नवी अनुभूती मिळते. त्यामुळे हेमंतकुमारांच्या गीतांची ही मैफल केवळ गायनाचा कार्यक्रम न राहता जुन्या आठवणींना उजाळा देणारा एक भावस्पर्शी संगीतप्रवास ठरला. म्हणूनच त्यांच्या आवाजाला 'Voice of God' म्हणतात.
श्री. प्रमोद कर्नाड यांनी हेमंतकुमारांच्या गीतांचा बाज, भाव आणि गोडवा जपत केलेले सादरीकरण अत्यंत प्रभावी होते. सौ. तपस्या कर्नाड यांचे सुरेख सूत्रसंचालन आणि द्वंद्वगीतांमध्ये प्रमोदजींना दिलेली समर्थ साथ लाजवाब होती. प्रत्येक गाण्याची पार्श्वभूमी, चित्रपटातील प्रसंग आणि नायक-नायिकेच्या भावना त्या इतक्या सुंदर शब्दांत उलगडून सांगत होत्या की गीत सुरू होण्यापूर्वीच त्याचे भावविश्व श्रोत्यांच्या मनात तयार होत होते.
कार्यक्रमातील काही निवडक गीतांवर श्री. राजेंद्र कारंजकर आणि सौ. कारंजकर यांनी केलेल्या नृत्याने कार्यक्रमात आणखी रंग भरला आणि मैफलीला अक्षरशः चार चाँद लागले. गायन, निवेदन आणि नृत्य यांचा सुंदर मिलाफ झाल्यामुळे हा कार्यक्रम अत्यंत दर्जेदार आणि सर्वोत्कृष्ट ठरला.
या सुंदर संगीत मैफलीचा आस्वाद घेण्याचे भाग्य आम्हा उभयतांना लाभले, हा आमच्यासाठी आनंदाचा क्षण होता.
विशेष आनंदाची बाब म्हणजे या कार्यक्रमाच्या निमित्ताने माझ्या ‘जीवन तरंग’ पुस्तकाच्या निर्मितीशी जोडलेली अनेक साहित्यप्रेमी मंडळी योगायोगाने एकाच ठिकाणी भेटली. माझ्या पुस्तकाला श्री. प्रमोद कर्नाड यांनी प्रस्तावना दिली आहे. मला पुस्तक लिहिण्यासाठी प्रोत्साहन देणारे आणि अनेक ठिकाणी शब्दांकनासाठी मोलाची मदत करणारे  तसेच माझे पुस्तकाला सुंदर अभिप्राय देणारे निवेदक श्री. दिलीप जांभळे, पुस्तकावर परीक्षणवजा लेख लिहिणारे लेखक श्री. सर्जेराव कुईगडे, तसेच पुस्तक प्रकाशनावेळी पत्रकारांशी संवाद साधून पुस्तकाची स्तुती करणारे डॉ. अशोक पाटील यांची तेथे भेट झाली. साहित्य आणि संगीताच्या या सुंदर वातावरणात या सर्व जिव्हाळ्याच्या व्यक्ती भेटल्याने माझा आनंद आणखी द्विगुणित झाला.
माझे मित्र श्री. आनंद कागले हे हेमंतकुमारांचे विशेष चाहते आहेत. ते अनेकदा त्यांच्या आवडीची गाणी गात असतात. विशेष म्हणजे श्री. प्रमोद कर्नाड यांनी कार्यक्रमाची सुरुवात आनंद कागले यांच्या आवडत्या हेमंतकुमारांच्या गीतानेच केली. त्यामुळे आनंद कागले हे खुश झाले.
ज्यांच्यामुळे हा कार्यक्रम आयोजित करण्यात श्री कर्नाड यांना यश मिळाले असे साहित्य संघ मंदिर संस्थेचे अध्यक्ष श्री सुभाष कुलकर्णी, सामाजिक क्षेत्रात नवी मुंबईमध्ये एक आगळे वेगळे नाव असणाऱ्या अमरजा चव्हाण आणि  अतिशय सुंदर आभार प्रदर्शन केलेल्या स्वाती देशपांडे मॅडम यांना विशेष धन्यवाद!
एकंदरीत, हेमंतकुमारांच्या अवीट गोडीची गाणी, प्रमोद कर्नाड यांचा सुरेल आवाज, तपस्या कर्नाड यांचे प्रभावी निवेदन, कासारकर दाम्पत्याचे नृत्य आणि रसिकांचा उत्स्फूर्त प्रतिसाद यामुळे ही मैफल एक अविस्मरणीय आणि मनात दीर्घकाळ दरवळत राहणारी संगीतसंध्या ठरली. 🎶